ՓՈԽԻ՜Ր, ՄԻ ՀԱՊԱՂԻ՜Ր:

ՀԱՅԿԱԿԱՆ «ՆԱՇԻ»-ն ԱՌԱՋԱԴԻՄՈՒՄ Է

armenyan — Thu, 10 Sep 2009 05:59:16 +0000

Վերջերս տեղի ունեցավ “Միասին” երիտասարդական շարժման ակտիվիստների հավաքը Սևանի ափին: Հայաստանի ապագա առաջնորդները հավաքվեցին, մի լավ տժժացին, հասցրեցին հյուրընկալել ՀՀ նախագահ Սերժ Սարգսյանին և վարչապետ Տիգրան Սարգսյանին: Ողորմելի այցելուները շեշտեցին, թե ինչ կարևոր են երիտասարդները Հայաստանի համար և որ ապագան իրենց հետևում է և մի շարք նման բաներ` դեմքի լուրջ արտահայտությամբ:
Ակնհայտ էր, որ այդ ճամբարը ֆինանսավորում էր իշխանությունների կողնից և նպատակ ուներ դաստիարակել մի սերունդ՝ իրենց իսկ պատկերով ու նմանությամբ: Երիտասարդների մի խումբ, որոնք նույն կերպ կգան իշխանության (կեղծիքներով, սպանդով) և նույն կերպ կիշխեն (խաբելով և թալանելով): Այդպիսի մի ստվար զանգվածի էին եկել ողջունելու ՀՀ բարձրագույն պաշտոնյաները:
Եվ զարմանալի չէր, որ նման միջոցառման համար հրավիրվել էր ջոկատավար Ռուսաստանից: Օրինակ թրեյներներից մեկը Ռուսաստանի Պետդումայի պատգամավոր, երիտասարդության հարցերով հանձնաժողովի անդամ, «Ռոսիա մոլոդայա» շարժման առաջնորդ Մաքսիմ Միշչենկոն: Եթե ծանոթ չեք, ապա ասեմ, որ “Ռոսիա մոլոդայա” երիտասարդական շարժումը “ՆԱՇԻ” ու “Եդիանայա Ռոսիայի երիտասարդական գվարդիա” շարժումների հետ մեկտեղ իշխանություններին սատարող ուժերից է: Սովետական կոմսոմոլի ավանդույթով այս շարժումների անդամներն ծառայում են ռեժիմին ու աստիճանաբար հասնում հաջողության` շարունակելով իրենց “պապաների” քաղաքականությունը:
Մեր մոտ վիճակն էլ ավելի դաժան է: Ինչպես Սերժիկ Սարգսյանն ընտրություններում “հաղթելուց” հետո վազում է շնորհակալություն հայտնելու իր թրեյներներին Ռուսաստանում, նույնպես էլ “Միասին”-ի ջահելները կրթվում են Սերժիկի թրեյների բալեքի կողմից և, ով գիտի, կարող է պատահել, որ մի օր նրանցից ամենատականքը, ամենախորամանկն ու “հայրենասերն” վազի շնորհակալություն հայտնելու իր դասատուներին, որոնք կհասցնեն փոխած լինել իրենց շեֆերին (երևի թե շատ վատատես եմ):
Եվ այդպիսի սերունդ է դաստիարակվում այսօրվա իշխանությունների կողմից և պրոպագանդվում որպես երիտասարդ հայրենասեր առաջնորդներ:
Արդյո՞ք սրանք են լինելու մեր երկրի դեմքը մի տաս տարի հետո:

Լուսանկարը` Հրապարակի

Posted in Հասարակություն, Քաղաքականություն Tagged: Միասին, Նաշի, հայրենասեր

Դե մերն ուրիշ է

armenyan — Mon, 20 Jul 2009 06:48:01 +0000

Մեկ տարուց ավել է, ինչ Հայաստանում քաղբանտարկյալների մի մեծ զանգված կա: Նույնիսկ համաներման կիրառումից հետո նրանց թիվը Հայաստանում շարունակում է մնալ 20-ից ավել: Վերջերս իշխանությունները դիմեցին էլ ավելի ստոր քայլերի և «գործ սարքեցին» Հայ Ազգային Կոնգրեսի (ՀԱԿ) երիտասարդ ակտիվիստ Տիգրան Առաքելյանի գլխին: Հայաստանում քաղաքական լարվածությունը չի մարում: Դրա պատճառներն են իշխանությունների օրինազանցությունները և մարդկանց անտարբերությունը:
Չնայած չէ, մարդիկ այնքան էլ անտարբեր չեն: Երբ Ադրբեջանում ձեռբակալեցին և սկսեցին “գործ են սարքել” ադրբեջանցի երկու երիտասարդներ Ադնանի և Էմինի գլխին, միանգամից հզոր ակտիվացում ի հայտ եկավ մեր հայ երիտասարդների շարքում: Դա առավել քան ճչացող էր սոցիալական ցանցերից ամենամեծում՝ Facebook-ում: Այն մարդիկ, որոնք ձայն չէին հանում տարուց ավել Հայաստանում առկա տասնյակ քաղբանտարկյալների մասին, առավել ևս վերջերս ձեռբակալված ՀԱԿ երիտասարդ ակտիվիստի (ի միջիայլոց, և՜ Հայաստանում, և՜ Ադրբեջանում գործը սարքում են խուլիգանության հոդվածով), արագորեն սկսեցին բարձրաձայնել Ադրբեջանում տիրող անարդարությունները: Այդ ամենը կարելի է անվանել մեկ բառով՝ ՕՏԱՐԱՄՈԼՈՒԹՅՈՒՆ:
Ցավալի է, երբ հարևան երկրում բանտարկում են անմեղ երիտասարդ ակտիվիստների և ձգտում, որ «քաղբանտարկյալ» երևույթն անպակաս լինի Ադրբեջանում: Ես նույնպես միացա մի քանի խմբերի, որպեսզի իմ բողոքը հայտնեմ այդ ամենի կապակցությամբ: Բայց ես կարծում եմ յուրաքանչյուր օտարամոլությամբ տառապող հայ, ով միանում է նման խմբերի և բողոքի ձայն բարձրացնում, պետք է հասկանա, որ ինքն առնվազն ազնիվ չէ: Այսինքն, երբ դատապարտում ես մի երևույթ, իսկ քո դիմացը տեղի ունեցող վայրագությունների նկատմամբ անտարբեր ես, դիմացինդ չի հավատա քո արարքների ազնվությանը, որովհետև դրանք ձևական կթվան:
Ցանկալի կլինի վերջ տալ նման երևույթներին, քանի որ մեր, հայերիս, դժբախտության պատճառներից մեկը դարեր շարունակ եղել է օտարամոլությունը: Մենք կսիրեինք, կգուրգուրեինք հեռավորին՝ թքած ունենալով մեր կողքինի վրա: Մինչդեռ լուծի՜ր քո խնդիրները, այնուհետև օգնի՜ր մյուսներին: Հակառակ դեպքում ծիծաղելի լինելուց զատ քո արարքները չեն անվանի:

Posted in Հասարակություն Tagged: Armenia, Emin and Adnan, ՀԱԿ, Քաղբանտարկյալ, Ադրբեջան, political prisoners, օտարամոլություն

Սկսվեց…

armenyan — Thu, 21 May 2009 07:15:25 +0000

Սիրելի ընկերներ:

Սա մի նոր բլոգ է, որտեղ հնարավորություն կտրվի բոլորին արտահայտել իրենց մտքերը այս կամ այն հարցերի շուրջ:

Այս բլոգը նպատակ ունի բարձրացնել Հայաստանի հանրությանը հուզող խնդիրները և փորձել գտնել դրանք փոխելու դեղատոմսերը: Չէ որ ամեն ինչ յուրաքանչյուր քաղաքացու ձեռքերում է: Եվ երկրի տեր լինելու միակ երաշխիքն է ամեն մեկիս գործողությունը: Ուստի բոլորին խնդրում եմ ոչ թե նստել թախտին ու զարմանալ, թե էդ ո՞նց եղավ, որ երկիրը կործանվեց, այլ փորձել կառուցել մեր ուզած երկիրը (հնարավորությունների չափով):

Կա մի քանի խնդրանք.

1. Չհայհոյել;

2. Գրել հայերեն տառերով;

3. Լինել ակտիվ

Եթե իրոք ցանկանում եք փոփոխություններ, անցե՜ք գործի:

Posted in Uncategorized Tagged: բլոգ, սկիզբ